ဟိုပုံး စက်တင်ဘာ ၁၃
ရှမ်းပြည်နယ်(တောင်ပိုင်း)၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဟိုပုံးမြို့နယ်တွင် ၂၀၂၃-၂၀၂၄ ဘဏ္ဍာရေးနှစ်၊ ပြည်နယ်ခွင့်ပြုရန်ပုံငွေဖြင့် ဝယ်ယူဖြန့်ဖြူးသည့် ဒေသဝက် (၅၀)ကောင်အား မွေးမြူရေး ဘဏ်စနစ်ဖြင့်မွေးမြူမည့် အိမ်ထောင်စု (၁၂) စုထံသို့ လွှဲပြောင်းပေးအပ်ပွဲ အခမ်းအနားကို စက်တင်ဘာ (၁၃)ရက် နံနက် (၁၀)နာရီအချိန်က ဖက်ရမ်းကျေးရွာအုပ်စု၊ ပုံးအယ်ကျေးရွာတွင် ပြုလုပ်သည်။
ရှေးဦးစွာ ပအိုဝ်းကိုယ်ပိုင်အုပ်ချုပ်ခွင့်ရဒေသ စီမံအုပ်ချူပ်ရေးအဖွဲ့ ဥက္ကဋ္ဌ ဦးခွန်ရဲထွေးနှင့် တာဝန်ရှိသူများက ပုံးအယ်ကျေးရွာဘုန်းတော်ကြီးကျောင်း ဆရာတော်အား သွား ရောက်ဖူးမြော်၍ အလှူငွေများဆက်ကပ်လှူဒါန်းခဲ့ကြသည်။ ထို့နောက် အခမ်းအနားကိုကျင်းပရာ ပအိုဝ်းကိုယ်ပိုင်အုပ် ချုပ်ခွင့်ရဒေသ မွေးမြူရေးနှင့် ကုသရေးဦးစီးဌာနမှ ဒုတိယညွှန်ကြားရေးမှူး ဒေါက်တာနီနီဝင်းက ဒေသ ဝက်(၅၀)ကောင်ဖြန့်ဖြူးခြင်းနှင့် ပတ်သက်၍ ရှင်းလင်းပြောကြားပြီးနောက် မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးမြင့်ထွန်း၊ မြို့နယ်စီမံအုပ်ချုပ်ရေးအဖွဲ့ အဖွဲ့ဝင် ဦးခွန်ကောင်းချစ်ထွန်းတို့က မွေးမြူရေး လုပ်ငန်းများအောင်မြင်စွာအကောင်အထည်ဖော်ဆောင်ရွက်နိုင်ရေးနှင့်ပတ်သက်၍ ရှင်းလင်းပြောကြား သည်။ ဆက်လက်၍ မြို့နယ်ကြီးကြပ်မှုကော်မတီမှ ဒေသဝက်(၅၀) ကောင်နှင့်ပတ်သက်သည့် စာချုပ် စာတမ်းများအား ကျေးရွာကော်မတီ ထံသို့ လွှဲပြောင်းပေးအပ်ခဲ့ကြပြီး မွေးမြူရေးတောင်သူ တစ်ဦးမှ ကျေးဇူးတင်စကားပြန်လည်ပြောကြားခဲ့သည်။ ယင်းနောက် ပအိုဝ်းကိုယ်ပိုင်အုပ်ချုပ်ခွင့်ရဒေသ စီမံအုပ်ချုပ်ရေး အဖွဲ့ ဥက္ကဋ္ဌ ဦးခွန်ရဲထွေးက နိုင်ငံတော်အကြီးအကဲ၏ လမ်းညွှန်မှုနှင့်အညီ ပအိုဝ်းကိုယ်ပိုင် အုပ်ချုပ်ခွင့်ရဒေသအတွင်း အသားကဏ္ဍလျာထားချက် ပြည့်မီစေရေးအတွက် ဌာနဆိုင်ရာများ၊ အသင်း အဖွဲ့များ၊ တောင်သူများမှ ဟန်ချက်ညီညီကြိုးပမ်းဆောင်ရွက် ရန်မှာကြားခဲ့ကြောင်း သိရသည်။
ဆက်လက်၍ ပအိုဝ်းကိုယ်ပိုင်အုပ်ချုပ်ခွင့်ရဒေသ စီမံအုပ်ချုပ်ရေးအဖွဲ့ ဥက္ကဋ္ဌ ဦးခွန်ရဲထွေး၊ မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးမြင့်ထွန်း၊ မြို့နယ်စီမံအုပ်ချုပ်ရေးအဖွဲ့ အဖွဲ့ဝင် ဦးခွန်ကောင်းချစ်ထွန်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ မွေးမြူရေးနှင့်ကုသရေးဦးစီးဌာနမှ ဒုတိယ ညွှန်ကြားရေးမှူး ဒေါက်တာနီနီဝင်းနှင့် တာဝန်ရှိသူများက ၂၀၂၃-၂၀၂၄ ဘဏ္ဍာနှစ် ပြည်နယ်ခွင့်ပြု ရန်ပုံငွေဖြင့် ဝယ်ယူဖြန့်ဖြူးသည့် ဒေသဝက်(၅၀)ကောင်အား ဒေသဝက်မွေးမြူမည့် တောင်သူထံသို့ အသီးသီးပေးအပ်ခဲ့ကြကြောင်းသိရသည်။ အဆိုပါဖက်ရမ်းကျေးရွာအုပ်စု၊ ပုံးအယ်ကျေးရွာသည် အစားထိုးဖွံ့ဖြိုးရေးလုပ်ငန်းဆောင်ရွက်မည့် ကျေးရွာဖြစ်ကြောင်းသိရသည်။
ရှမ်းပြည်နယ်အစိုးရအဖွဲ့ရုံး