တောင်ကြီး ဖေဖေါ်ဝါရီ-၁၈
တောင်ကြီးတက္ကသိုလ် ၂၀၂၃-၂၀၂၄ပညာသင်နှစ် ဂုဏ်ပြုဆုနှင်းသဘင်ပွဲကို ဖေဖေါ်ဝါရီ(၁၈)ရက် နံနက်(၉)နာရီက တောင်ကြီးမြို့၊ တောင်ကြီးတက္ကသိုလ်၊ ဘွဲ့နှင်းသဘင်ခန်းမ၌ ကျင်းပသည်။
ဂုဏ်ပြုဆုနှင်းသဘင်အခမ်းအနားတွင် ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးအောင်အောင်က ၂၀၂၃ – ၂၀၂၄ပညာသင်နှစ်တွင် အထူးပြုဘာသာရပ်အသီးသီး၏ အတန်းအသီးသီးမှာ ပထမဆုရရှိခဲ့ကြသော ကျောင်းသား၊ ကျောင်းသူများ၊ (၇၇)နှစ်မြောက် လွတ်လပ်ရေးနေ့နှင့် (၇၈)နှစ်မြောက် ပြည်ထောင်စုနေ့အထိမ်းအမှတ် ကဗျာ၊ စာစီစာကုံး၊ ဆောင်းပါးနှင့် ပန်းချီပြိုင်ပွဲများတွင် ဆုရရှိခဲ့ကြသည့် ကျောင်းသား၊ ကျောင်းသူများ၊ ပြည်နယ်အဆင့်အားကစားပြိုင်ပွဲများတွင် ဆုရရှိခဲ့ကြသော ကျောင်းသား၊ ကျောင်းသူများကို ဂုဏ်ပြုဆုချီးမြှင့်သည့် အခမ်းအနားဖြစ်ပါကြောင်း၊ ကျောင်းသား၊ ကျောင်းသူများ စာပေဗဟုသုတရှာမှီးမှု၊ ရသခံစားတတ်မှုကို လေ့ကျင့်ပျိုးထောင်ပေးသည့်အနေဖြင့် စာကြည့်တိုက်အသုံးပြုမှု အများဆုံးဆုကိုလည်း ပေးအပ်သွားမည်ကို သိရပါကြောင်း၊ ကျောင်းသား၊ ကျောင်းသူများအနေဖြင့် ယနေ့အခမ်းအနားတွင် ဂုဏ်ပြုချီးမြှင့်ခံရခြင်းမျိုးကို ဆက်လက်၍ရရှိအောင် ကြိုးစားသွားကြရန်၊ အတူတကွပညာသင်ယူနေကြသည့် သူငယ်ချင်းညီအစ်ကို မောင်နှမများကိုလည်း ကြိုးစားချင်သည့် အလေ့အကျင့်ကောင်းများ ပြန့်ပွားအောင် လက်တွဲခေါ်ယူပေးကြရန် ပြောကြားသည်။
ထို့နောက် တောင်ကြီးတက္ကသိုလ် ၂၀၂၃ – ၂၀၂၄ပညာသင်နှစ် ဂုဏ်ပြုဆုနှင်းသဘင်ပွဲအတွက် ရှမ်းပြည်နယ်အစိုးရအဖွဲ့က ဂုဏ်ပြုချီးမြီင့်ငွေများကို ပြည်နယ်ဝန်ကြီးချုပ် ဦးအောင်အောင်က ပေးအပ်ရာ တောင်ကြီးတက္ကသိုလ် ပါမောက္ခချုပ်မှ လက်ခံရယူပြီး တောင်ကြီးတက္ကသိုလ် ကျောင်းသားကျောင်းသူများမှ စိန်စီနန်းကပန်း တက္ကသိုလ်သီချင်းဖြင့် သီဆိုဖျော်ဖြေကြသည်။
၎င်းနောက် ပထမနှစ်၊ ဒုတိယနှစ်၊ တတိယနှစ်၊ စတုတ္ထနှစ်၊ ပဥ္စမနှစ်တွင် ပထမရရှိသော ကျောင်းသား၊ ကျောင်းသူများအား တောင်ကြီးတက္ကသိုလ် ဒုတိယပါမောက္ခချုပ်များ၊ နည်းပညာတက္ကသိုလ်(တောင်ကြီး) ဆေးတက္ကသိုလ်(တောင်ကြီး) ပါမောက္ခချုပ်များမှ အသီးသီးဆုများ ချီးမြှင့်ပေးကြပြီး ပထမနှစ်၊ ဒုတိယနှစ် တတိယနှစ် ဂုဏ်ထူးတန်းတွင် ပထမရရှိသော ကျောင်းသား၊ ကျောင်းသူများအား တောင်ကြီးတက္ကသိုလ်ပါမောက္ခချုပ်၊ ပြည်နယ်ဥပဒေချုပ်၊ ပြည်နယ်တိုင်းရင်းသားရေးရာဝန်ကြီးတို့က ဆုများချီးမြှင့်ပေး၍ လည်းကောင်း၊ မဟာအရည်အချင်းစစ်သင်တန်းတွင် ပထမရရှိသော ကျောင်းသား၊ ကျောင်းသူများ၊ မဟာပထမနှစ်၊ ဒုတိယနှစ်သင်တန်းတွင် ပထမရရှိသည့် ကျောင်းသား၊ ကျောင်းသူများကို ပြည်နယ်ဝန်ကြီးများက ဆုများချီးမြှင့်ပေး၍ လည်းကောင်း၊ ထူးချွန်ကျောင်းသား၊ ကျောင်းသူများနှင့် စာကြည့်တိုက်တွင် စာဖတ်အများဆုံး ကျောင်းသား၊ ကျောင်းသူများအား ပြည်နယ်ဝန်ကြီးချုပ် ဦးအောင်အောင်က ဆုများချီးမြှင့်ပေးကြပြီး တောင်ကြီးတက္ကသိုလ် ကျောင်းသား၊ ကျောင်းသူလေးများမှ ရှမ်းရိုးရာအက ၊ဒို့ပြည်ထောင်စုအတွက် အကများဖြင့်ဖျော် ဖြေတင်ဆက်ကြကြောင်း သိရှိရသည်။
ထိုမှတစ်ဆင့် ပြည်နယ်ဝန်ကြီးချုပ်နှင့်အဖွဲ့သည် တောင်ကြီးတက္ကသိုလ် ဝင်းအတွင်းရှိ မိုးရေစုကန် ပြုပြင်ဆောက်ရွက်ပြီးစီးနေမှု ကြည့်ရှုစစ်ဆေး၍ ကန်ပတ်လျှောက်လမ်းအတွင်း ချောင်းကူးတံတား ဆောင်ရွက်ပေးရန်နှင့် ကန်ပတ်လည်သစ်ပင်များ စိုက်ပျိုးပေးကြရန် သက်ဆိုင်ရာဌာနများနှင့် ပေါင်းစပ်ဆောင်ရွက်ပေးခဲ့ကြောင်း သိရှိရသည်။
ရှမ်းပြည်နယ်အစိုးရအဖွဲ့ရုံး